Што се подразбира под „дебело дете“?
Дебелината се дефинира како присуство на премногу масно ткиво. Дебелото дете има повеќе масно ткиво, отколку што одговара за возраста.
Кои се причините?
- Дебелината е често фамилијарна особина. Дебелите родители веројатно ќе имаат дебело дете. Ова е резултат на комбинација на наследните фактори и нездравиот начин на исхрана и живот, со недоволно физичка активност.
- Понекогаш дебелината е предизвикана од медицински причини (заболувања) или како резултат на дејството на некои лекови.
Какви проблеми може да предизвика дебелината?
- Дебелината може да доведе до астма и до апнеа во сон.
- Може да доведе до срцева болест, шеќерна болест, покачен крвен притисок, мозочен удар и канцер.
- Дебелите деца во училиште може да се отфрлени или да им се потсмеваат.
- Дебелите деца се со повисок ризик за депресија.
Како да се утврди дали детето е дебело?
Врз основа на мерење на висината и тежината и споредување со вредностите кои се дадени како нормални за таа возраст. Ако порастот во тежина е над просечниот лекарот ќе се обиде да утврди зошто е тоа така.
Како да се третира?
Треба да се измени начинот на исхраната, физичката активност и животниот стил. Наградете го вашето дете, за секој и најмал успех.
Диета за слабеење?
Не го подвргнувајте детето на рестриктивна диета, помогнете му да ја замени нездравата, со здрава исхрана. Диетите трајат кратко, а ефектите се присутни само додека трае диетата. Здравата исхрана треба да е долготорајна цел. Придржувајте се кон следните препораки:
- Научете го вашето дете да ја жвака храната полека и да ужива во јадењето.
- Ручекот нека биде пријатен настан за фамилијата, без ТВ, радио сл.
- Не го терајте детето, да ја испразни чинијата до крај.
- Обезбедете оброците да бидат редовни.
- Избегнувајте да држите вишок храна на масата. Сервирајте ја храната во неговата чинија. Порцијата треба да биде отприлика, колку што е величината на дланката на раката.
- Приготвувајте здрава храна, која има висока нутритивна вредност но помалку калории.
- Избегнувајте масна, храна , зејтин и слатки.
- Избегнувајте пиење на газирани пијалоци, сокови и чоколадно млеко. Овие напитоци се многу калорични. Најдобра за гаснење на жедта е водата.
- Ако вашето дете е постаро од 2 години, употребувајте млеко на кое му е отстранет кајмакот или обезмастено млеко.
- Ограничете ја количината на високо-калориска храна и чувајте ја подалеку од погледот на детето.
- Не му купувајте на детето чипс, кокици и сл
- Немојте да ја користите храната како средство за казнување или награда.
- Објаснете им во градинката дека се обидувате да воведете здрав начин на исхрана, за да ве подржат.
- Никогаш не започнувајте никаква диета за слабеење без претходна консултација со вашиот лекар или диететичар.
Физичка активност
Уживајте во физичката активност заедно со своето дете. Вежбите ја подобруваат координацијата и му овозможуваат на детето подобро да се изрази себеси:
- Практикувајте пешачење, пливање, возење точак и трчање. Фокусирајте се повеќе да уживате и да се чувствувате посилни, а не на губитокот на тежината.
- Наместо лифт, користете скали.
- Кога е можно, одете пешки наместо со кола.
- Докторите препорачуваат минимум 30 минути физичка активност на ден
Животен стил
- Ограничете го времето кое го поминува пред телевизорот и компјтерот. Охрабрете го детето да прави нешто поактивно, како што е да игра или да помага во куѓата.
- Јадете на маса, не пред телевизорот.
- Ограничете го времето кое го поминува со видео-игри
- Избегнувајте разговори за тежината. Фокусирајте се повеќе на тоа дека дебелината може да доведе до здравствени проблеми.
- Не дозволувајте потсмевање, нити погрдни имиња поврзани со дебелината.
- Дебелите деца се со поголем ризик да развијат депресија. Помогнете им да најдат активности во кои ќе уживаат и во кои ќе бидат успешни.
- Учете го вашето дете како да се справува со стресот. Некои деца бараат прибежиште во храната за да си олеснат.
- Овие промени може да се тешки за детето. Ако не ги прифаќа, немојте да ги наметнувате со сила. Настапете позитивно, охрабрето го и придружете му се. Се е полесно ако учествува целата фамилија.
Дали дебело дете значи и дебел возрасен?
Со промена на исхраната, физичката активност и животниот стил, најголемиот дел од децата се подобруваат. Во тек на растењето во висина, мал дел ќе ја надминат својата дебелина. Дел остануваат дебели до адолесценцијата и како возрасни. Дебелите деца се со повисок ризик да бидат дебели возраасни.
Дали дебелината може да се превенира?
Најдобра превенција е инсталирање на здрави навики пред да дојде до дебелина, во што клучна улога играат родителите. Тие го креираат стилот на фамилијата, кој треба да е активен, со многу прошетки и физичка активност, а со помалку гледање телевизија и седечки активности. Родителите ја креираат исхраната на фамилијата, која треба да е здрава, со помалку високо-калорична џанк храна. Децата треба да се научат да го ценат своето тело и своето здравје.
Каде да се обратите за помош?
- Вашиот педијатар
- Нутриционист
- Клиника за детски болести - ендокринолошка амбуланта
|
